Að leita ásjár erlendra ríkja til að komast hjá þjóðaratkvæðagreiðslu.

ég sé að það eru fleiri en ég sem hugsa til þess að það þurfi aðstoð erlendra aðila.  Málið er að þessi ágætu menn eru ekki að hugsa um aðstoð við íslenska þjóð, heldur aðstoð við að hindra að íslenskur almenningur segi sitt álit.

 

http://frettir.ruv.is/frett/leyniskjal-ur-sendiradi-bna

 

Þarna segir m.a;

Fram kemur í endursögn af fundum þeirra að breski sendiherrann segi að eigin stjórn gæti verið reiðubúin til að skoða kosti sem yrðu til þess að koma í veg fyrir  þjóðaratkvæðagreiðslu um Icesave. 

Í þessu leynilega minnisblaði er einnig greint frá fundum sem bandaríski sendierindrekinn átti með Einari Gunnarssyni, ráðuneytisstjóra í utanríkisráðuneytinu og Kristjáni Guy Burgess, aðstoðarmanni utanríkisráðherra. Greinir hann frá því að þeir Einar og Kristján hafi lýst efnahagslegum hörmungum ef Icesave málið færi í þjóðaratkvæðagreiðslu og yrði fellt. Hafi þeir lagt ofuráherslu á að Bandaríkjamenn myndu styðja Íslendinga opinberlega í málinu.

Svona erum við nú hættuleg ráðamönnum.  Ég held satt að segja að þetta sé dropinn sem fyllir mælinn, hjá mér allavega.´

Mig langar að setja hér inn smá úrdrátt af lögum um landráð;

10 kafli almennra hegningarlaga fjallar um landráð og þar voru nokkur atriði sem stungu óneitanlega í augun! 86. gr. Hver, sem sekur gerist um verknað, sem miðar að því, að reynt verði með ofbeldi, hótun um ofbeldi, annarri nauðung eða svikum að ráða íslenska ríkið eða hluta þess undir erlend yfirráð, eða að ráða annars einhvern hluta ríkisins undan forræði þess, skal sæta fangelsi ekki skemur en 4 ár eða ævilangt. 88. gr. [Hver, sem opinberlega í ræðu eða riti mælir með því eða stuðlar að því, að erlent ríki byrji á fjandsamlegum tiltækjum við íslenska ríkið eða hlutist til um málefni þess, svo og hver sá, er veldur hættu á slíkri íhlutun með móðgunum, líkamsárásum, eignaspjöllum og öðrum athöfnum, sem líklegar eru til að valda slíkri hættu, skal sæta …¹⁾ fangelsi allt að 6 árum. Ef brot þykir mjög smávægilegt, má beita sektarhegningu.]²⁾91. gr. Hver, sem kunngerir, skýrir frá eða lætur á annan hátt uppi við óviðkomandi menn leynilega samninga, ráðagerðir eða ályktanir ríkisins um málefni, sem heill þess eða réttindi gagnvart öðrum ríkjum eru undir komin, eða hafa mikilvæga fjárhagsþýðingu eða viðskipta fyrir íslensku þjóðina gagnvart útlöndum, skal sæta fangelsi allt að 16 árum. Sömu refsingu skal hver sá sæta, sem falsar, ónýtir eða kemur undan skjali eða öðrum munum, sem heill ríkisins eða réttindi gagnvart öðrum ríkjum eru undir komin. Erum við ekki komin út á dálítið hálan ís hér.  Og hve lágt geta ráðamenn landsins lagst til að komast hjá því að leyfa okkur sauðsvörtum almúganum að ráða?  'Eg bara spyr.  Forsetinn gaf okkur þetta vald og við skulum neita að samþykkja annað en að við fáum að halda þessa þjóðaratkvæðagreiðslu.  Það fer að verða spurning um hvort við stöndum í lappirnar sem þjóð eða hvort við ætlum okkur að láta teyma okkur á asnaeyrum áfram veginn.  Þetta er eiginlega komið nóg.

einhverra hluta vegna kom fréttin ekki inn í linknum, svo ég set hana inn hér;

Bandaríkin vildu ekki styðja Ísland

Bandaríksa sendiráðið.

Breski sendiherrann tjáði bandarískum starfsbróður sínum fyrir mánuði að bresk stjórnvöld gætu fallist á leiðir sem kæmu í veg fyrir þjóðaratkvæðagreiðslu um Icesave.

Þetta kemur fram í leyniskjali úr bandaríska sendiráðinu sem fréttastofa hefur undir höndum. Það fjallar meðal annars um beiðni íslenskra stjórnvalda til Bandaríkjamanna um stuðning.

Breski sendiherrann á Íslandi reyndi fyrir mánuði að fá Norðmenn til að axla ábyrgð á Icesave-skuldinni. Þetta kom fram í viðræðum breska sendiherrans við starfsbróður sinn í bandaríska sendiráðinu sem aftur gerði grein fyrir þessu í leynilegu minnisblaði sem sent var til Bandaríkjanna.

Þetta minnisblað  ritaði Sam Watson, sem veitir bandaríska sendiráðinu forstöðu um þessar mundir þar sem Bandaríkjamenn hafa enn ekki skipað sendiherra á Íslandi. Minnisblaðið er merkt trúnaðarmál og á ekki að koma fyrir almenningssjónir. Það er dagsett 13. janúar, viku eftir að forsetinn neitaði að staðfesta Icesave-lögin og vísaði þeim í þjóðaratkvæðagreiðslu.

Sam Watson greinir frá fundum sem hann á með fulltrúum íslenskra stjórnvalda um Icesave-málin og með Ian Whiting, sendiherra Bretlands á Íslandi. Fram kemur í endursögn af fundum þeirra að breski sendiherrann segi að eigin stjórn gæti verið reiðubúin til að skoða kosti sem yrðu til þess að koma í veg fyrir þjóðaratkvæðagreiðslu um Icesave. Whiting greindi Sam Watson frá því að hann væri að kanna lausn deilunnar sem fælist í að Norðmenn myndu veita lán til Íslendinga fyrir allri Icesave skuldinni; í raun axla ábyrgðina á henni. Norðmenn myndu svo semja við Íslendinga um endurgreiðslur. Breski sendiherrann taldi að með þessu gætu báðir deiluaðilar lýst yfir sigri; Bretar og Hollendingar fengju peningana sína og Íslendingar gætu greitt skuldir sínar á hagstæðari kjörum. Breski sendiherrann tjáði bandarískum starfsbróður sínum að hann myndi ræða þessa leið sama dag við Margit Fredrikke Tveiten, sendiherra Noregs.

Í þessu leynilega minnisblaði er einnig greint frá fundum sem bandaríski sendierindrekinn átti með Einari Gunnarssyni, ráðuneytisstjóra í utanríkisráðuneytinu og Kristjáni Guy Burgess, aðstoðarmanni utanríkisráðherra. Greinir hann frá því að þeir Einar og Kristján hafi lýst efnahagslegum hörmungum ef Icesave málið færi í þjóðaratkvæðagreiðslu og yrði fellt. Hafi þeir lagt ofuráherslu á að Bandaríkjamenn myndu styðja Íslendinga opinberlega í málinu. Þegar því var hafnað og bent á að Bandaríkjamenn væru hlutlausir í málinu svörðu þeir því til að hlutleysi væri ekki valkostur; það jafngilti því að fylgjast með einelti ofbeldishrotta án þess að grípa inn í. 

Þriðji fundurinn sem fjallað er um er með Bandaríska sendifulltrúanum og Hjálmari Hannessyni, sendiherrar Íslands í Bandaríkjunum. Hjálmar skóf ekkert af því og trúði Watson fyrir því að stjórnarkreppa yrði á Íslandi ef þjóðin felldi Icesave í þjóðaratkvæðagreiðslu. Höfnun í þjóðaratkvæðagreiðslu þýddi vantraust á ríkisstjórnina og með því hefði forsetanum, sem ætti að vera ópólitískur, tekist að fella lýðkjörna ríkisstjórn. Hjálmar sagðist þekkja Ólaf Ragnar vel og sagði að hann væri óútreiknanlegur. Fréttastofa fékk þetta skjal fyrir milligöngu Wikileaks sem birtir það á vef sínum innan skamms.

 

[e-mail]

Innlendar fréttir

Athugasemdir

[Haraldur Rafn Ingvason, 18.2.2010 kl. 19:39]

ég hef alltaf verið sannfærður um að pólitíkusarnir mundu með öllum ráðum reyna að koma í veg fyrir þessa atkvæðagreiðslu. Það er hennar vegna sem stjórn og stjóranrandstaða þykjast hafa komist að samkomulagi um í þinginu varðandi icesave, enginn þeirra vill gefa þjóðinni tækifæri á að fella þennan óskapnað - enda afleitt fordæmi!

Fyrirhuguð atkvæðagreiðsla er einnig ástæðan fyrir því að bretar eru nú allt í einu til í að ræða málin. Bretar eru sko ekki að hugsa um þetta eingöngu vegna þess að þetta valdi óhæfum íslenskum pólitíkusum vandræðum, heldur eru þeir að hugsa um eigin skinn. Þeir hafa engann áhuga á að þurfa að svara þeirri spurningu heima hjá sér af hverju breskur almenningur eigi að borga hina risavöxnu reikninga sem honum verða sendir vegna hins gríðarlega vanda sem breska fjármálakerfið er í.

[Jóhann Elíasson, 18.2.2010 kl. 20:01]

Það er ekki HÆGT að ljúga neinu upp á þessa ríkisstjórn athafnirnar eru lyginni líkastar....

[Jón Sveinsson, 18.2.2010 kl. 20:07]

Það getur ekki verið neitt að því þótt Ég kalli ráðamenn þjóðarinnar landráðslið eða hvað annað sem er nógu viðbjóðslegt að út úr hvaða persónu getur farið ,þeir biðla til þjóða að gera liggur við hvað sem er til að stöðva það að við gjörum hlutina rétt er nokkuð annað en að taka völdin af þessum viðbjóði sem þessir ráðamenn eru að hugsa sér að nokkur geti kosið þessa flokka aftur,Þetta hlýtur að vera síðustu dagar þeirra á valdastóli.                           Fyrir þjóðina vona ég það, OG FRÁ MER SÉÐ HENGJA ÞÁ UPP TIL SÝNIS Á LÆKJARTORGI UM HELGAR.

[Ásthildur Cesil Þórðardóttir, 18.2.2010 kl. 20:19]

Já ég verð að segja það, að hér hefur verið seilst ansi langt og niður til að koma í veg fyrir að þjóðin geti sagt hug sinn. 

Eiginlega verð ég að segja að mér blöskraði svo að ég er eiginlega stjörf.  Hversu lágt geta svokallaðir ráðamenn eiginlega lotið til að komast hjá því að við fáum okkar rétt til að segja hvað við viljum gera?

Og ég er sannfærð um að við eigum réttin á því að neita að borga þessar skuldir sem við höfum ekki átt þátt í að neinu eða nema ef til vill sum okkar að einhverju leyti.

Þess vegna verðum við að fá að segja okkar álit.  Það má ekki taka þennan rétt af okkur AFTUR, þeir hafa gert það einu sinni, við skulum ekki gleyma því.  Þeir tóku af okkur kosninguna um fjölmiðlafrumvarpið.   Núna skiptir það bara meira máli efnahagslega fyrir okkur sem fjölskyldur, feður mæður, ömmur afa og ungt fólk með fjölskyldur.  Við þurfum að berjast fyrir tilverurétti okkar sem þjóðar.  Það er komið nóg af bulli og leyndóum og yfirgangi. 

Utanþingsstjórn strax!!!

[Jóna Kolbrún Garðarsdóttir, 18.2.2010 kl. 20:20]

Þetta nýjasta útspil stjórnarinnar er með ólíkindum.  Tikk, takk, tikk, takk...

[Ásthildur Cesil Þórðardóttir, 18.2.2010 kl. 20:22]

Já einmitt Jóna Kolbrún Tikk Takk, Marínó Njálsson enn og aftur.  Hann og margir fleiri eiga heiður skilinn. 

[Valdimar Samúelsson, 18.2.2010 kl. 20:59]

sjáið hér er ég búinn allt frá því í haust áður en Össur hentist út með umsóknina áður en blekið þornaði. Ég hef hamrað á að þetta væri landráð eins og kemur fram hjá Ásthildi. Ég sendi dómsmálaráðuneytinu fyrir spurn og sendi kæru til Ríkislögreglustjóra en hún var felld á tecnicalaty. Fyrir utan það ef hún hefði náð í gegn þá væri það í höndum dómsmálaráðherra hvort kæra á ráðherra yrði tekin til greina. Ég segi nú Stöndum öll saman að kæru þ.e. Össuri, Jóhönnu fyrir landráð og Steingrími fyrir stefnuskrársvik þ.e. bein opinber svik við sína kjósendur. Þetta allt getur ekki verið deginum ljósara.  

[Jóhann Elíasson, 18.2.2010 kl. 21:25]

Eins og ég segi í einu bloggi mínu þá þora Bretar og Hollendingar ekki með Ices(L)ave málið fyrir dómstóla.  Ég tel að það náist ekki nokkur sátt um þetta mál og langeðlilegasta leiðin er að fara með þetta fyrir dómstóla og ef við verðum dæmd til að greiða þetta þá er komið að samningum við þá annars geta þeir bara étið það sem úti frýs.

[Haraldur Rafn Ingvason, 18.2.2010 kl. 22:55]

Þökkum okkar sæla fyrir wikileaks, var ekki búinn að sjá þetta þegar þegar ég skrifaði fyrsta kommentið. Þetta er stórfróðlegt! Sé ekki hvernig stjórnarhöfuðin eiga að geta látið sjá sig í björtu eftir þetta.

Það er skondin túlkun hjá sendiherranum að hinn ópólitíksi forseti sé að fella "lýðkjörna" ríkisstjórn með því að vísa málinu í atkvæðagreiðslu. Það er nefnilega þannig að forsetinn er eini aðilinn að þessu máli sem er kosinn beint af fólkinu og hefur þar með sitt umboð beint frá því - ólíkt ríkisstjórn. Hlutverk hans er m.a. að stöðva sérlega vond mál sem með einhverjum hætti hafa komist gegn um þingið og vísa þeim til þeirra sem veita bæði þingi og forseta umboð sitt - þ.e. þjóðarinnar.

Síðan er ágætt að hafa þann skilning innan úr stjórnkerfinu að falli málið í kosningu, falli stjórnin. Þá er varla nokkur möguleiki eftir í stöðunni annar en margumbeðin utanþingsstjórn - ári of seint að vísu en það verður að hafa það.

[Helga Kristjánsdóttir, 19.2.2010 kl. 02:38]

 Það verður dansað á torgum,þegar við höfum losað okkur við ógeðfelldustu stjórn allra tíma.

[Davíð Þ. Löve, 19.2.2010 kl. 12:42]

OG HVAÐ?? Fá Siðspillingarflokkana til valda á ný??? Hvað er að, gott fólk? Trúir því nokkur maður að við munum fá utanþingstjórn? Spillingarflokkarnir bíða eftir tækifærinu að henda Evu Joly úr landi svo hægt sé að bjarga eigin skinni áður en ormagryfjan opnast af alvöru. Samt djúpt hugsi eftir árás vinstri manns á hana. Enn eymir af hrokanum og rembingnum í garð fólks sem veit betur en þessir heimóttalegu fávitar. Hann sér ekki alla sérfræði aðstoðina sem fer fram í leitinni að stórþjófunum.

[Ásdís Sigurðardóttir, 19.2.2010 kl. 13:11]

Er orðlaus   farðu vel með þig í flensunni, þú hefur verið svo upptekin síðustu mánuði að núna er líklegt að flensan hitti þig illa fyrir þegar slaknar á spennunni.  Knús til þín elskan mín.

[Ásthildur Cesil Þórðardóttir, 19.2.2010 kl. 13:48]

Takk Ásdís mín.  Ég reyni að fara vel með mig.

Davíð það er nokkuð augljóst að meirihluti íslendinga vill engan af fjórflokknum yfir sig eins og á stendur.  Fyrst þurfa þeir að fara í aflúsun.  Það er verið að ræða neyðarstjórn skipaða sérfræðingum sem hefur takmarkað umboð til að ganga frá málum sem ríkisstjórn og andstaða ráða augsjáanlega ekki við. 

Já Helga mín við skulum dansa, þegar þetta er afstaðið.

[Davíð Þ. Löve, 19.2.2010 kl. 14:14]

Ja, 33% þjóðarinnar er að hóta því að kjósa siðspillingarflokkin (þann stærri) Þessi fjöldi virðist þjást af sama hörmulega kvilla og þeir. Og síðan á ég eftir að sjá fjórflokka veldið sleppa takinu á sínu. Það mun aldrei verða fyrr en við sjálf hirðum völdin í þessu landi. Verðum við ekki bara að taka eitt stykki "Franska" byltingu með fallöxinni og öllum pakkanum? Sú tæki sig vel út á Austurvelli. Ha ha, nei, segi nú bara svona. Eða hvað???? Kveðja.

[Ásthildur Cesil Þórðardóttir, 19.2.2010 kl. 15:36]

Það hefur verið sagt að Sjálfstæðisflokkurinn sé ekki stjórnmálaafl heldur trúflokkur.  Eða eins og einn þeirra sagði, fólk sem vill láta hugsa fyrir sig, græða á daginn og grilla á kvöldin

Málið er að það er mín tilfinning að allir flokkarnir þessir fjórir séu að klofna.  Það er bullandi ágreiningur í Vinstri Grænum, það er Steingrímsarmurinn sem gæti alveg fallið saman við vinstri krata í Samfylkingunni, svo er það Ögmundararmurinn, sem myndi fara lengst til vinstri.  Hægri kratar í Samfylkingu gætu alveg tekið saman við hógværari Sjálfstæðismenn og þar færi svo hægri öfgamennirnir og frjálshyggjupostularnir lengst til hægri.  Ég og félagi minn vorum einmitt að tala um þetta í morgun.  Svo kemur til kristilegur flokkur, hann mun sópa til sín einhverjum af trúarnötturum Sjálfstæðisflokksins.  Ég er heldur ekki búin að afskrifa Frjálslyndaflokkinn, Borgarahreyfinguna eða Hreyfinguna, held samt að það væri affarasælast fyrir þau brot að reyna að starfa saman, annað hvort með sameiningu eða samtarfi. 

Það er auðséð að þetta er allt meira og minna að flosna upp, þó er auðvitað aldrei að vita þegar fólkið er komin á kosningabásinn sinn hvort það kýs ekki bara D fyrir drottinn eða svona rétt eins og beljurnar sem rata alltaf heim á sinn bás.

En ef við ætlum að hreinsa til, verðum við sem kjósendur að hætta þessu og fara upp úr hjólförunum og þora að kjósa eitthvað annað en afi og amma pabbi og mamma kusu. Þora að sleppa bátshliðinni og taka sundið.  Ef lýðræðið á að þroskast, þá verðum við að læra að veita aðhald, með því að refsa þeim sem ekki halda sín kosningaloforð.  Það versta sem til er í lýðræðisríki er að pólitíkusarnir séu áskrifendur að atkvæðunum sínum, eins og verið hefur alltof lengi.  Lýðræðið kostar.  Það kostar að við mætum á kjörstað og þorum að gera það sem okkur finnst skynsamlegast, eða skila auðu.  Þess vegna má segia að ástandið sé ansi mikið fólkinu sjálfu að kenna, við höfum skapað þessi skrýmsli með því að kjósa þau alltaf aftur og aftur, hvernig sem þau hafa hagað sér.

[Haraldur Rafn Ingvason, 20.2.2010 kl. 00:34]

Vitanlega er fullt af heittrúuðum sauðum í öllum flokkum sem kjósa sitt lið hvað sem tautar og raular. En ef stjórnin springur er klárlega skollin á stjórnarkreppa. Eina leiðin sem glóra væri í við þær aðstæður væri að setja á utanþingsstjórn. Ef farið yrði í kosningar er ég klár á að fram kæmi sterk hreifing sem berðist fyrir að fólk hreinlega hundsaði þær - enda væri ekkert vit í öðru.

Nú gæti einhver sagt sem svo "já en þá gæti sjálfstæisflokkurinn náð hreinum meirihluta á þing með sitt 33% fylgi". Og hvað með það? Dettur mönnum í hug að hann fengi vinnufrið við þær aðstæður???

Niðurstaðan yrði áframhaldandi stjórnarkreppa og rugl. Það er ekki nema ein leið út úr þessu algera vantraustsumhverfi sem hefur skapast milli þessa óþverrafjórflokks og stórs hluta landsmanna. Það er utanþingsstjórn!

[Kidda, 20.2.2010 kl. 12:58]

Það eina sem kemur til greina fyrir framtíð þjóðarinnar er utanþingsstjórn með hæfu fólki til að leiða okkur út úr þessum ógöngum sem fjórflokkurinn kom okkur í.

[Ásthildur Cesil Þórðardóttir, 21.2.2010 kl. 22:35]

Nei það er máli Haraldur, slík stjórn fengi ekki vinnufrið, enda er nokkuð ljóst að enginn af fjórflokknum sækist eftir að vera í stjórn, ef þessi fer.  Guðjón Arnar var hjá mér í kaffi í dag, og ég spurði hann út í utanþingsstjórn eða neyðarstjórn.  Hann sagði mér að ef á skylli stjórnarkreppa gæti forsetinn nánast gert hvað sem væri.  Hann getur sett upp neyðarstjórn.  Ég held að eftir neitun forsetans á Icesavelögunum muni ég treysta honum til að setja upp slíka stjórn af fólki sem ræður við verkefnin.

Einmitt Kidda mín, þess vegna þurfa menn að mæta niður á Austurvöll og mótmæla og krefjast afsagnar núverandi stjórnar til að fá að borðinu fólk sem getur kann og vill.