Þorrablót á þorrablót ofan.

Ég er að fara á þorrablót inn í Reykjanes á morgun og verð þar yfir helgina.  Það verður frábært með Sæfara á Ísafirði, þeim frábæra kajakklúbb ásamt mínum ektamaka.

En ég er aldeilis búin að vera á þorrablótum undanfarið, get svo svarið það.

Fór á þorrablót hjá Frjálslyndaflokknum á síðustu helgi, hér eru systkini úr Kristjánshúsi frá Ísafirði. Hilda, Laufey og Jakob.

Og hér er einn bróðirinn, skólabróðir minn Guðjón Arnar að sýna eina afurð bróður síns doktor Jakobs sem er ekta íslenskur fjallagrasnafs.

Einhvernveginn varð þessi flokkur eitthvað meira en bara framboð, þar réði vinátta, virðing og barátta allt í senn. Og það verður aldrei frá okkur tekið.

Þó óvandað fólk reyndi að klína á okkur rasisma og allskonar illvirki, þá var það einungis andstyggðar áróður sem sumt fólk sem telur sig málsmetandi fólk, en hefur í mínu tilfelli hratað niður í ruslflokk eins og samkvæmt Moodies, eins og til dæmis Illugi Jökulsson, Kolbrún Bergþórsdóttir, Baldur Þórhallsson, Davíð Þór, eða hvað sá ágæti klerkalærdómsmaður nú heitir, ásamt öllum forystumönnum stjórnmála fjórflokksins. Sem þvert gegn sannfæringu sinni og vitneskju tóku æruna af því besta fólki sem ég hef þekkt í stjórnmálum fyrr og síðar. Og ég er reyndar að tala um félaga um allt land, en ekki bara þá sem hér höfðu aðstöðu til að mæta. 

En auðvitað á þetta að vera gleðifærsla, því hér erum við jú að skemmta okkur, eins og sannri fjölskyldu sæmir, því svo sannarlega er eins og góð fjölskylda sé að hittast þegar við hittumst öll sem eitt, og það er góð tilfinning.

Hér er Addi að skenkja þennan frábæra fjallagrasadrykk til fólksins, sem var vel þegin.

Þó fólk hafi þannig séð ákveðið að fara aðrar leiðir, þá er Frjálslyndi flokkurinn með sterkt aðdráttarafl.

Sem segir bara eitt; vinátta og samhyggð nær yfir alla pólitík, þannig flokkur var Frjálslyndi flokkurinn, einstakur og frábær.

Byggður á föstum grunni, með frábæru fólki sem má ekki vamm sitt vita.

Hér er okkar ágæti Sægreifi hinn eini og sanni, sem kom á þorrablótið beint frá spítala, til að gleðjast með sínu fólki, hér að skera niður reyktan ál.

Það er nefnilega þannig að þessi stjórnmálaflokkur var byggður á allt öðru en hreinni pólitík, hann var fyrst og fremst byggður á vináttu svo margra og málefnum og viljanum til að gera jákvæðar breytingar fyrir fólkið í landinu, og það er bara þannig og verður áfram.

Þessa eiginleika leggjum við inn í hinn nýja flokk Dögun. Þá hreinskiptni, vináttu og virðingu fyrir öllum, og það er einmitt það sem ég er svo stolt af að tilheyra.

Við komum allstaðar frá, erum ólík og höfum algjörlega ólíkan bakgrunn, en við erum bara Frjálslynd og þykir vænt um hvort annað.

Og það er nákvæmlega það sem við leggjum til í púkkið með þeim félögum okkar sem við höfum ákveðið að vinna með í næstu kosningum.

Og hér var góður matur á boðstólum frá Múlakaffi hvað annað?

Elsku Dísa, Steini og Pétur þið eruð sko flottust.

Já doktor Jakob sem hefur hannað fjallagrasalíkjörinn, sem svo sannarlega er hollur og líka ótrúlega bragðgóður.

Þeir tveir Addi og Kobbi eru tveir bræður og svo eru 7 systur ef ég man rétt. Engin smá barnahópur þeirra Jóhönnu og Kristjáns.

Þetta vakti líka athygli mína hehehe ef þið nennið að lesa hvað þarna stendur, þá er ekki allt sem sýnist.

En að lokum með þetta ágæta þorrablót, þá vil ég að lokum segja að ég held að Frjálslyndi flokkurinn hafi einfaldlega verið og gott mál til að endast, þarna var heiðarleiki og vilji til að gera vel í fyrirrúmi, en það var bara ekki tíminn til þess þá. En ég segi bara þetta leggjum við inn í Dögunarbankann og ég er viss um að þar munum við blómstra, vegna þess að þar er fólk sem hefur sömu væntingar og við, og sömu nálgun með vináttu, baráttu og þann kærleika sem þarf til að gera góða hluti.

Öflugur baráttumaður, einn af mörgum.

Þar sem Frjálslyndi flokkurinn er, er aldrei langt í harmonikku eða fjöldasöng.

Og allir skemmtu sér vel.

Og þarna voru gamalmál höfð um hönd

Grétar Mar með skemmtilega brandara. Og Guðmundur vinur okkar talaði út frá hjónabandinu það var mikið hlegið að því.

Bara allt svo gaman.

Sægreifin kvaddur með virktum, heiðursgestur og frábær stuðningsmaður.

Og svo er sungið eins og vera ber.

Málið er að ég myndi aldrei þrífast í pólitík sem væri bara valdabrölt, en þar sem ég hef verið með þá er það bara þannig, vinátta og virðing, þessa eiginleika finn ég nákvæmlega líka í Dögun, þó tekist sé á um mál, þá er gagnkvæm virðing og talað sig niður á ásættanlega niðurstöðu, enda er enginn foringi sem getur tekið af skarið, þar eru menn bara allir jafnréttháir og það er notalegt.

Ef einhverjum finnst þetta væmið, þá þarf hinn sami að fara í naflaskoðun og spá í hvað hann vill í pólitík, hvort hann vill foringjaræði, þar sem ákveðin forysta varðar veginn og sá þarf bara að aðlaga sig að því, eða hvor menn eru eiginlega ginkeyptari fyrir að fá að leggja sitt af mörkum, og segja sína skoðun, eina sem þarf er að nenna að mæta og tala.  Ekkert voða flókið.

Hér er svo annað þorrablót í þetta sinn fjölskylduvænt, tengdafólk dóttur minnar.

Ég var svo heppin að nákvæmlega meðan ég var í höfuðborginni, átti dóttir mín frá Austurríki erindi á heimaslóðir eiginmannsins, og nákvæmlega þá var mér boðið í þeirra árlega þorrablót.

Dóttir mín og mágkona hennar. Hún er reyndar afar heppin með tengdafólk, því þau eru afskaplega yndæl og fjölskylduvæn.

Raunar alveg yndislegt fólk.

Mamma, pabbi, dætur og barnabarn.

Og við kerlurna góða saman.

Yndislegt fólk sem stendur að dóttur minni.

Og hér er hún í fjölskyldunni frá hinni hliðinni.

En svo á ég eftir tvö þorrablót ég get svo svarið það. Á morgun ætlum við Elías inn í Reykjanes með Sæfara kajakklúbb og dvelja þar yfir helgina, og svo er annað þorrablót 16. febrúar Sléttuhreppsmót.

Þannig að ég má hafa mig alla við að skemmta mér  Talandi um þjálfun... er þetta ekki líka góð þjálfun.

En það sem ég vil segja að lokum er þetta: Ég tel min nokkuð þroskaðan einstakling, og reyndar ágætlega færa um að velja mér félagsskap við hæfi.  Og þess vegna elsku vinir sem hafið áhyggjur af því að ég sé að velja rangan félagsskap, þá get ég sagt að það er bara alls ekki rétt.  Ég er nákvæmlega í þeim frábæra og góða félagsskap sem ég hef valið mér bæði hvað varðar vini, fjölskyldu og stjórnmálaafl.  Svo ekki hafa áhyggjur af mér.  Ég hef nefnilega plummað mig ágætlega gegnum lífið, og er alveg dómbær á hvar finna má kærleika, umhyggju, réttlæti og allt það góða sem hægt er að hugsa sér.  Það er svo annað mál hvort þið skynjið það og meðtakið, því ég er viss um að við öll viljum gera Ísland betra.  Þá þarf aðeins að hugsa hvernig, og hvað við viljum leggja á okkur.

Og svo segi ég bara góða nótt elskurnar