Nokkur orð úr mínum hugarranni.

Ég var að reyna að svara frétt á Eyjunni áðan en það kom ekki inn, eða ég var of óþolinmóð.  En þar er rætt um nýja skoðanakönnum um fylgi ríkisstjórnarinnar.   http://eyjan.is/2010/07/01/studningur-vid-rikisstjorn-i-lagmarki-vinstri-graenir-fa-skell/

 

Svar mitt var svohljóðandi;

Það er dálítið skondið að hugsa til þess að þessi vonlausa og aðgerðarlitla ríkisstjórn flýtur nú á því að fólk er skíthrætt við að fá yfir sig Sjálfstæðisflokk og Framsókn.

 

Hvernig væri nú að huga að öðrum flokkum og gefa þeim tækifæri til að sýna hvað í þeim býr, ég nefni Frjálslyndaflokkinn, þar sem ég þekki til og veit að er heiðarlegt gott fólk með fullan vilja til að laga ástandið.  

Hreyfinguna sem hefur sýnt að þau standa í lappirnar og eru óhrædd við að tala hreint út og segja það sem segja þarf.

 

  Borgarahreyfingin hefur lítið verið í umræðunni eins og er, en ég veit að þau eru á fullu að starfa og vinna að málefnum.  

 

Ef við ætlum að komast út úr þessu helvíti, verðum við að þora að svissa yfir og skoða vel þessa þrjá möguleika.

 

Hægri græn get ég fullyrt að fái ekki hljómgrunn.  Ég sé og heyri það alveg.

Held líka að sá ágæti maður Guðmundur Franklín sé tækifærissinni af verstu sort, en það er bara mín persónulega skoðun af verkum hans hingað til. Að mínu mati einn af þeim sem hleypur til þegar hann sér sér færi á borði að vekja á sér athygli, við þekkjum þó nokkra slíka sem gistu Frjálslyndaflokkinn tímabundið.

 

 Og annað sem þvælist fyrir þeim sem vilja stofna nýjan hægri flokfk er,  að Sjálfstæðisflokkurinn mun ekki leyfa það að þeir komist neitt áfram.  'Eg veit vel hvernig var klínt öllu sem hægt var að klína á Frjálslynda flokkinn og einna helst var að þaga hann í hel.  Við skulum ekki gleyma að fjölmiðlar dansa allir eftir pípum þeirra sem ekki vilja endurnýjun.   Þess vegna verðum við að hlusta á það sem þessir aðilar hafa fram að færa m.a. á blogginu og fésbvókinni þau hafa ekki aðra möguleika til að koma sér á framfæri.  En það er okkar að gefa þeim gaum og tækifæri.

 

Ég efast ekkert um að Guðbjörn er vænsti maður og vill vel, en hann lét allt yfir sig ganga og varði sjálfstæðisflokkinn í bak og fyrir alveg þangað til braut á Evrópusambandsaðild.  

 

Ég fullyrði að enginn af fjórflokknum vilji breytingar, og þau munu og hafa notað öll þau meðul sem þau kunna í bókinni til að láta það ekki gerast að aðrir flokkar komist inn fyrir dyrnar.   Nema ef til vill grín eins og Gnarr og félaga, sem þau ráða ekki við, en ógna engum í raun og veru. 

Ég er á því að besta sem gerðist hjá okkur væri utanþingsstjórn með fagfólki eins sem er ekki flokksbundið en með hag Íslands fyrir brjósti og almennings í landinu.   Þegar talað er um að atvinnuleysi sé minna en gert var ráð fyrir, segi ég nú bara þetta hefur verið viðkvæðið í gegnum tíðna hér fyrir vestan, en það var bara vegna þess að fólki flutti burtu þegar það hafi ekki atvinnu lengur.  Sama er að gerast með landið í heild, þeir sem missa vinnuna og komast í burtu fara.  Svo atvinnuleysisgrýlan hefur bara flutt sig til.  Aðrir sem reyna að þrauka eru að sligast.   Og margir eru að hugsa sér til hreyfings vegna þess að fólki finnst ekkert gerast í þeirra málum og síðasta útspil viðskiptaráðherra, seðlabankastjóra og fjármálaeftirlist fylla fólk ekki beinlínis bjartsýni á framtíðina.  

Hversu lengi heldur þessi lánlausa "norræna velferðarstjórn" eiginlega að hún geti blóðmjólkað landslýð, með meiri álögum, hærri sköttum og skuldaklöfum. 

Nei takk það er komið nóg, og ég vil biðja Jóhönnu Sigurðardóttur og Steingrím Sigfússon að gera okkur þann greiða að stíga niður og fara fram á að hér komist á koppinn utanþingsstjórn næstu tvö til fjögur árin.  Svo Ísland megi ná vopnum sínum.