Upphitun fyrir mótmæli.

Þýsku vinir mínir Hnífsdælingarnir Abrecht búa lengst inn í Þýskalandi, langt frá sjónum.  Þau eru sannir íslandsvinir og hafa keypt sér lítið hús við sjóinn í Hnífsdal, þar sem þau eyða sínum fríum.  Þau hafa líka leigt húsið út til fólks sem kemur hér og nýtur þess að vera við sjóinn og í náttúrunni.  Svo var ákveðið að gera göng til Bolungarvíkur, sem ekki er nema bara gott mál.  En síðan var ákveðið að leggja veg sjávarmeginn við húsið þeirra.  Þau hafa lengi unað sér þarna í fríum veitt fisk í soðið og notið þess að vera á þessum friðsæla stað.  Nú breytist allt, enginn aðgangur að sjó lengur, og sennlega mun hávaðinn af bílum glymja í kyrrláta húsinu þeirra.  Það er því ekki sama eignin og þau keyptu af bænum á sínum tíma. 

Þau fóru því og mótmæltu þessum gjörningi á táknrænan hátt í dag.

Og slagorðið er orðið klassiskt ekki satt!

Þau eru bæði vel menntuð hjónin, og vita hvað þau syngja í þessu máli.  Hún er arkitekt og hann sólarorkusérfræðingur.

Vonandi fær þetta að standa fólki til viðvörunar.  Því eins og þau segja, hvað gerist ef peningarnir klárast þegar gerður hefur verið hálfur vegur og hálf göng? Væri ekki nær að klára göngin og sjá svo til, hvort þörf er á þessum vegi?

Ásthildi er svo sem sama, því hún étur bara appelsínur og nóg af þeim.

Hún er líka tilbúin í ræktunina.  En vegna allra smáputtana sem alltaf eru á þessu heimili þá setti afi steypu ofan á pottinn.  Moldin var endalaust út um öll gólf.

Hér er svo prinsessudyngjan með öllum flottu prinsessukjólunum. 

Myndir af fjöllunum.  Veðrið var gott í dag eins og venjulega.  Mikið er farið af snjónum eins og sjá má.

Og jafnvel þó skuggsýnt sé orðið, þá er fjallamálverkið á pollinum. 

En ég ætla að setja hér inn mynd sem var stungið að mér.  Veit einhver deili á þessu fólki?  Mér finnst ég kannast við þau, en kem þeim ekki fyrir mig.

Það væri gaman að fá nöfnin og söguna.

Svo verð ég að segja það fyrir mig að ég skil ekki alveg þetta niðrandi tal um þá mótmælendur sem bera grímur.  Hvað er að því að fólk hylji andlit sin ef það vill?  Svo lengi sem mótmælin eru friðsamleg og á góðum nótum.  Við hvað er fólk hrætt?  Er það of mikið gláp á erlendar fréttir?  Eða hvað er það sem vekur fólki þennan ótta. 

Er þetta sama og með fólk sem skrifar nafnlaust?

Ég skrifa alltaf undir nafni, og myndi aldrei hylja andlit mitt.  En ég get vel skilið fólk sem það gerir.  Ég veit nefnilega að Ísland er ekki meira lýðræðisríki en svo, að fólk hefur verið látið gjalda fyrir það að hafa skoðanir sem ekki hugnast annað hvort vinnuveitanda eða ráðamönnum.  Þess eru mýmörg dæmi.  Þetta kemur iðulega upp á yfirborðið í kosningabaráttu.  Ég veit ekki hve margar sögur ég hef frá fólki sem þorir til dæmis ekki að láta uppi stuðning við minn flokk, vegna hótana.  Og aðrir sem ekki treysta sér til að fara á lista.  Fólk hefur misst vinnuna vegna þátttöku í pólitísku starfi, fleiri en einn og fleiri en tveir.

Sama gæti átt við um mótmælendur sem hylja andlit sín.  Þið ættuð frekar að beina reiðinni að þeim spilltu yfirvöldum og vinnuveitendum sem haga sér þannig, en ekki fólkinu sem jafnvel er að verja sjálft sig og fjölskylduna. 

Ísland er ekki lýðræðisríki í dag, heldur gjörspillt einokunarríki, því fyrr sem þið opnið augun fyrir því, því fyrr tekst okkur að endurreisa lýðræðið og koma á réttlæti.  Meðan fólk gengur um eins og blindir kettlingar og heldur að allt sé í himnalagi eruð þið að gefa skotleyfi bæði á ykkur sjálf og alla hina.  TAKK FYRIR ÞAÐ.

Eigið svo gott kvöld elskurnar.