Ég er þjóðin - þjóðin er ég.... og þú!

Miðað við hve hörð mótmælin voru í gær, og svo viðtal við einn þingmann samfylkingarinnar sem sagði að hann gæti ekki stutt ríkisstjórnina lengur bætti við aðspurður að hann teldi að þingmenn bæði hjá sjálfstæðismönnum og samfylkingu væru sama sinnis, þá bjóst ég eiginlega við því að fá að heyra þær fréttir í morgun fyrst af öllu að Geir H. Haarde hefði gengið til forseta og beðist lausnar fyrir sig og ráðuneyti sitt.

En nei ó nei, það sem ég heyrði var yfirlýsing frá dómsmálaráðherra um að hann ætlaði að fjölga lögreglumönnum. 

Nú þekki ég ekki þankagang ráðamanna og ég mun sennilega seint skilja hann eða af hverju stólarnir eru svona þægilegir, þó þeir séu orðnir brennandi heitir svo úr rjúki.  Hvað er það sem þau óttast svo mjög að þau loka augum og eyrum fyrir kröfum fólksins?

Þetta er fólkið sem þurfti að læðast heim í gærkveldi bakdyrameginn.  Halda þau virkilega að fólk hætti og gefist upp?  Að þetta síendurtekna staðfestuleysi íslendinga gerist nú eins og alltaf áður.  Þau gefast upp og allt verður í lagi.  Svo verður þetta gleymt í næstu kosningum?

Já ég held því miður að það sé rauninn.  Að Þau virkilega haldi að ef þau þreyja þorran og góuna, þá hætti þetta allt saman, fólkið gefist upp og síðan komi til þetta venjulega gullfiskaminni sem við erum fræg fyrir.

Það versta við þetta er að við höfum sjálf skapað þetta ástand.  Við höfum kennt þeim að við sitjum bara þæg og góð sama hvað gert er.  Einkavinavæðing, ráðning vina og vandamanna í toppstöður, spilling einstakra ráðherra og jafnvel lögbrot af þeirra hendi.  Við höfum hreinlega kennt þeim að svona megi.  Þess vegna geta þau ekki skilið að í dag sé þetta ekki svona.  Að nú sé allt breytt, alvaran tekinn við.  Þau halda í alvöru að þetta sé bara skrílslæti í einhverjum vinstri grænum.  Þeir vita að þeir hafa tögl og haldir í fjölmiðlum, og að þar sé reynt að fegra ímynd þeirra og mála hina dekkri litum.

En jafnvel það er að breytast.  Fjölmiðlafólk er að verða aðgangsharðara og farið að sýna meira af hegðun þeirra.  Það kemur örugglega af þrýstingi frá fólkinu á gólfinu, sem sættir sig ekki lengur við þöggunina.  Þau þurfa bara að standa saman í því að slá skjaldborg til varnar sannleikanum og réttlætinu, svo það verði ekki þaggað niður.

Ég veit að flestir lögreglumenn eru prúðmenni og gott fólk.  Innan um þann hóp leynast því miður bullur og ofbeldismenn, sem njóta þess að "láta helvítin hafa það".  Slíkir menn eiga aldrei að fá leyfi til að ganga í búningum.  Þeir setja blett á alla hina sem vinna af trúmennsku og góðum hug.  Það eru mennirnir sem eyðileggja trúnaðartraustið sem almenningur verður að geta borið til lögreglunnar.  Það þarf líka að taka piparúðann af þessum mönnum, þeir hafa sýnt að þeir nota hann til að vera í stórkallaleik og rambóstælum.  Ég er mjög hissa á að það skuli ekki vera búið að grípa í taumana og innkalla þessa úða, svo misnotaðir sem þeir eru.  Það getur ekki þýtt nema eitt, stjórnvöld samþykkja þetta ofbeldi.  Eftir höfðinu dansa limirnir, og það virðist vera að þessum mönnum sé hreinleg veitt veiðileyfi á mótmælendur.  Þetta er ekkert nýtt, því þeir hafa lengi haft svona "skotleyfi" á undirmálsfólk og fíkniefnaneytendur.  Þetta er bara stigið fyrir ofan, því samkvæmt skilgreiningu valdsins eru mótmælendur skríll. 

Það sem yfirvöld skilja ekki, vegna gjárinnar sem aðskilur þá frá fólkinu að hér er alvara á ferð.  Sífellt fleiri missa lífsviðurværi sitt, sjálfsvirðinguna og tækifærin til að framfleyta sér.  Um leið og það er tekið frá fólki gerist eitthvað.  En á sama tíma og þetta gerist, þá er sýnt að valdið heldur hlífiskyldi yfir þeim sem rupluðu og rændu fólkið.  Þeir sem hafa sitt á hreinu í skattaparadísum hér og þar um heiminn, og ætla að kaupa landið upp á brunaútsölu.  Með fullkomnu leyfi og aðstoð valdsins.  Svona lítur nú dæmið út ef maður skoðar atburði síðastliðna mánuði.

Og svo biður þetta fólk um vinnufrið.  Óskapast yfir hávaðanum.  Forseti þingsins segir með hroka að auðvitað komi það alls ekki til greyna að breyta neitt starfi þingsins.  Forgangurinn er líka augljós, það er verið að fjalla um leyfi til sölu á bjór og léttvíni í verslunum.  Hvernig eigi að greiða fyrir innvols og líkamsparta og ég veit ekki hvað og hvað. 

Er nema von að fólki blöskri.  Síðast útspil sýslumannsins á Selfossi var svo einn af dropunum sem fyllti mælinn.  Að auglýsa fjöldahandtökur á skuldara meðan þjófarnir ganga lausir.  Þó honum hafi verið gert að hætta við þann gjörning var skaðinn skeður. 

Fólki er hreinlega ofboðið og það er ekkert skrítið við það.  Fólkið sem er að mótmæla er þjóðin sjálf, þetta eru ekki bara einhver vinstri græn, eða stúdentar, eða einhver gengi.  Þetta eru ömmur afar, mæður, feður allt litrófið við ég og þú.  Um leið og lögregla piparúðar mótmælenda á Austurvelli, piparúðar hann mig um leið og lögga handleggsbrýtur mann með kylfu, handleggsbrýtur hún mig.  Ég deili lífsreynslunni með þeim sem verða fyrir ofbeldinu af því að ég deili áhyggjum mínum með þeim samsama mig þeim.  Væri þarna sjálf ef ég hefði tækifæri til.  Reiðin sem gagntekur mig við að horfa upp á lögregluna misbeita valdinu er reiði þjóðarinnar.  Þjóðar sem loksins hefur risið upp og mótmælir óréttlæti, svikum, lygum og öllum þeim óþverragangi sem finna má. 

Krafan er einföld hún getur ekki verið einfaldari; við viljum ykkur burt.  Við viljum ekki að þið aukið lögregluafskipti, við viljum heldur ekki að þið farið að skipta út mannskap, eða grauta eitthvað og krukka í ykkar liðum.  Við viljum hreint borð.  Við viljum neyðarstjórn samsetta af fagfólki, sem bjargar því sem bjargað verður NÚNA.  Við viljum svo fá að kjósa í vor.  Ef þið bara opnið augu og eyru þá getið þið heyrt að þetta er krafa þjóðarinnar, meira að segja krafa flestra þeirra sem deila með ykkur flokkum.