Villa Aurora - Vienna.

Ég fór með hinum Austurrísku vinum mínum á mjög skemmtilegan stað í gærkveldi.  Ég kynntist þeim reyndar þannig að þau komu í kúluna, vildu fá að hitta þessa skrýtnu konu og ræða við hana um lífið og tilveruna.  Og þar með var boltanum kastað.  Þau eru íslandsvinir, og planið er að koma til Íslands aftur næsta sumar.  Hann er fyrrverandi blaðamaður og blaðaljósmyndari, hætti eftir 10 ára starf, af því að honum fannst blaðamennskunni vera of mikið stjórnað af peningamönnum.  Hún vinnur með börnum á á listasafni fyrir börn, og er að ljúka námi í listasögu.  Þau eru rosalega yndæl bæði tvö.

En við fórum á stað sem heitir Villa  Auróra, á einni hæðinni hér í Vín, þetta er eins og upp í sveit, staður sem er út úr, þó hann sé aðeins í örfárra mínútna keyrsla frá miðbænum.  Þarna er allt gert til að gestum líði vel.  Þar er stór grasflöt sem er fyrir "Picnic" á sumrin, þegar frost er, þá búa þeir til skautasvell á flötinni, þarna er gamall fiskibátur sem hægt er að fara upp í og með nesti útbúið frá veitingastaðnum, það er líka hægt að fá picnickörfu og teppi út á grasflötina, og það er bara rosalega flott þarna, og allt ódýrt.  Ég mæli með þessum stað ef þið eruð á ferð í Vín.

Þetta er grasflötin góða.

Þessir herramenn sem flestir kannast við brostu við manni þegar maður kom inn.

Hér erum við svo öll, við fengum okkur auðvitað vínarsnitzel, hvað annað.  Og alveg rosalega gott.

Hér er svo báturinn, ég veit ekki hvort hann er með kvóta hehehe.

Garðurinn er heilt ævintýri út af fyrir sig.

Hér erum við hátt upp í útsýnisturni þar sem hægt er að horfa yfir Vín og nágrenni.  Christina tók þessa mynd sjálf af okkur.  

Frábært kvöld.  Ef þið hafið áhuga, þá er addressan Villa Aurora - Vienna, A-1160, Wilhelminenstrabe 237, at the corner of Savoyenstrabe. 

Og nú er nefnilega komin laugardagur.  Góðar stundir. 

Skemmtileg mynd frá Svönnu bloggvinkonu og æskuvinkonu minni.

Ég skrifaði um daginn um hana Brynju Arthúrsdóttur, hún var með mér í Dóminikanska Lýðveldinu, hún er blind, en það kemur ekki í veg fyrir að hún ferðist víða, og mér finnst hún algjör hetja, það er ekki auðvelt að ganga um á svæðinu með fulla sjón, hvað þá ef maður sér ekki vel.  En hún lét engar hindranir aftra sér frá því að fara hvert sem hana lysti.  Ég elska svona fólk, sem yfirvinnur erfiðleikana og sýna manni svo ekki verður um villst að það er allt hægt, fólk eins og Brynja vekur manni jákvæða hugsun.  'Eg tek það fram að ég hugsa það sama um vinkonu mína Svanfríði Gísladóttur frá Súðavík, sem hefur líka átt við mikla vanheilsu að stríða.  En hún sendi mér nefnilega mynd af þeim stöllum, þegar þær voru ungar, og Brynja var að taka við stafi sem Svanna gengdi.  ég ákvað því að smella inn þeim myndum hér svona til gaman, tvær hetjur.

 

Hér er svo Brynja í dag.

Flottar konur.  Frábærir félagar. 

mbl.is tíu ára.

Ég vil bara nota þetta tækifæri til að óska afmælis"barninu" og aðstandendum þess til hamingju með tíu árin.  Ég held að netmiðlar hafi breytt landslaginu í fjölmiðlaheiminum.  Sérstaklega eftir að bloggið kom til sögunnar, og svo spjallrásirnar.

Nú hefur hinn litli Jón Jónsson tækifæri til að tjá sig.  Það hefur tekið tíma fyrir blaðamenn að sætta sig við þetta, auðvitað, þvi það var ákveðin samkeppni fólgin í því.  Auðvitað hafa menn alltaf getað skrifað greinar og birt í Morgunblaðinu og öðrum blöðum, en það tók tímann sinn, og oftar en ekki var umræðuefnið búið og gleymt þegar það birtist, ef það þá var tekið inn.  Það hafa verið áhöld um slíkt. 

Auðvitað er það svo að það eru ekki allir sem höndla þetta vald, og verða sér til skammar með skrifum sínum, og stundum þarf að loka á fólk.  En allur þorri manna, hefur staðið sig með sóma, og gert alla umfjöllun áhugaverðari, með víðari sjónarhorn en áður. 

Þetta er ákveðið vald sem er fært niður til hina almenna manns, og ég fyrir mína parta er þakklát fyrir það.  Ég þarf oft að tjá mig um ýmislegt, og ekki er verra að fá svör og jafnvel útskýringar, sem maður fékk ekki í blaðagrein. 

Svo ég segi bara Mbl stjórnendur og aðstandendur til hamingju með öll 10 árin. 

Tíu ára afmæli mbl.is