Stjórnvöld færa auðmönnum landsins 60 milljarða - hvað finnst ykkur ?

Eins og ég sagði frá í gækveldi, þá fór ég á áhugaverðarn fund hjá Frjálslyndaflokknum. Tvennt var þar rætt sem vakti mikla athygli mína og annara. Það er í fyrsta lagi sú ákvörðun að fara að flytja inn hrátt kjöt frá öðrum löndum. Það mun hafa gríðarleg áhrif á störf í langbúnaði og afurðarstöðvum, og fækka störfum á landsbyggðinni verulega, sérstaklega á þeim stöðum sem hvað mest eiga nú undir högg að sækja, eða norðvestur- og austurkjördæmi. Það er engu líkara en menn ætli að láta fúlmennið sem rústaði sjávarútveginum, ganga milli bols og höfuðs á landbúnaðinum líka. Það verður fallegur eftirmáli manns sem virðist bara ganga erinda húsbænda sinna, búin að gleyma öllum loforðum og fólkinu sem kaus hann á þing. Svei attan bara. En ég hef hugsað mér að ræða þetta mál betur seinna, því það er annað mál og brýnna sem verður afgreitt frá þinginu á morgun, að öllum líkindum.

Það er gjöf ráðamanna til auðmanna landsins upp á 60 milljarða.

Hér er verið að tala um að hagnaður sölu á hlutabréfum bara á árinu 2006 sé í kring um þúsund milljarðar. Þar af er álitið að stór hluti þess sumir nefna 400 milljarða, séu fluttir beint úr landi og enginn skattur er greiddur af þeim peningum til sameiginlegra þarfa landsmanna. Hluti af upphæðinni hafi skilað sér í sameiginlega sjóði landsmanna.

Síðan hafa menn getað geymt í tvö á að greiða gjöld af þessum gróða, í þeim potti eru nú 336 milljarðar. Af þessu ættu menn að greiða 18% skatt, eða um 60 milljarða króna sem hefðu komið í ríkissjóð.

En nei nú ætla ríkisstjórarflokkarnir að gefa auðmönnum Íslands þessa 60 milljarða. Lög þar að lútandi verða samþykkt frá Alþingi Íslendinga núna á fimmtudaginn, eða á morgun. Sjá nánar hér. http://www.kristinn.is/frettirpage.asp?ID=1209

Að þessari samþykkt standa samfylking og sjálfstæðismenn. Það kom líka fram í gær að sennilega ætlar Framsóknarflokkurinn að sitja hjá í þessu eða verður ekki með í andstöðu frumvarpsins með Frjálslyndum og Vinstri grænum. Þeir verða að passa sitt fólk sennilega í orkahópnum.

Ég heyrði Kristinn H. Gunnarsson segja í gær, að þetta sé það versta sem hann hafi séð á alþingi íslendinga frá upphafi, og megi þó margt týna til sem ekki þoli mikla umfjöllun.

Nú langar mig til að spyrja alþýðu þessa lands. Eruð þið samþykk því að gefa auðmönnum landsins eftir 60 milljarða ?

Finnst ykkur allt í lagi að með einu pennastriki sér afskrifaðar allar skattaálögur af þessu tagi á auðmenn landsins. Og hér er bara verið að taka tölur fyrir eitt ár, það safnast þegar saman kemur. Þetta verður ekki aftur tekið.

Finnst ykkur allt í lagi að þessir menn sem vissulega berast á, eiga meira en nóg fyrir sig og sína, þurfi EKKI AÐ TAKA ÞÁTT Í SAMFÉLAGINU.

Hvað finnst ykkur sem kusuð Samfylkinguna, sem kallar sig jafnaðarmannaflokk landsins, að þeir standi að svona stórgjöf til handa fólkinu sem mest á í þessu þjóðfélagi. Stefna Sjálfstæðisflokksins kemur ekki á óvart. Á meðan ekki er hægt að gera eins vel við öryrkja og aldraða eins og loforð voru gefinn um. Meðan ekki er hægt að greiða þau laun í heilbrigðiskerfinu sem þarf til að viðhalda stöðugleika og öryggi landsmanna í heilbrigðismálum. Og það má margt telja upp. Landið er að sporðreisast vegna þess að landsbyggðinni er að blæða út, og þetta fólk situr bara og ákveður að gefa milljarðamæringunum eftir 60 milljarða.

Mér er sama hvar í flokki þið eruð, þetta er aðför að lífskjörum okkar. 60 milljarðar er ekki svo lítill peningur, ég er viss um að Björgúlf munar ef til vill ekki mikið um þann hluta sem hann fær út úr þessu, eða Jón Ásgeir og fleiri sem vita ekki aura sinna tal. En ætli litli maðurinn hann Jón Jónsson skilji og vilji þetta, þegar hann er að missa húsið sitt og aleiguna, vegna þess að bæði verðtryggingar, og vextir hafa hækkað upp úr öllu valdi. sem skýrir gróða auðmannanna ekki satt, þessi auður kemur frá vaxtapíningu á almenning.

Ekki vill ríkisstjórnin minnka álögur á olíu og benzín, telja sig ekki HAFA EFNI Á ÞVÍ…. Eða hvað. En þeir hafa efni á að gefa ríku mönnunum sextíu milljarða. Og ekki bara 60 milljarða, heldur er þetta bara byrjunin.

Hvenær ætlum við að standa upp og mótmæla. Rökin eru, já takið eftir rökin eru þau, að annars flytji þeir bara peningana úr landi. Þeir hafa þó flutt burtu um 400 milljarða, af áætluðum gróða ársins 2006.

Indriði H. Þorláksson benti á það nýlega að hann hafi mælst til þess að menn yrðu skyldaði til að gefa upp verðbréfaeign sína, hvort heldur sem hún væri hérlendis eða erlendis. Svo hægt væri að fylgjast með hvort þeir greiddu skatta af þeim í öðrum löndum, og ef ekki að þeir greiddu af þeim hér á landi. Skattur af verðbréfum er 18% en á að lækka í 15% sem er svipað og í öðrum löndum.

Ætlar þetta fólk að horfa framan í okkur kjósendur með það á samviskunni að hafa skrifað undir þessa stórkostlegu gjöf til þeirra sem mest mega sín ?

Ætla kjósendur bara að brosa og láta þetta yfir sig ganga ? Hvað um ykkur samfylkingarfólk, eruð þið sátt, eða framsóknarmenn ? Finnst ykkur þetta bara allt í lagi ?

Og takið eftir, það er ekkert fjallað um þetta í fjölmiðlum. Af hverju skyldi það vera ? Það er nefnilega ekki í þágu auðmannanna sem eiga fjölmiðlana, og heldur ekki þeirra stjórnmálamanna sem svona haga sér. Þjóðinni skal blæða út. Þjóðinn fólkið í landinu má bara krafsa sig sjálft út úr sínum erfiðleikum. Það má missa aleiguna, grundvöllinn undir lífi sínu, og éta það sem úti frýs. Bara ef auðmennirnir fá sitt. Og hvað ætli svo pólitíkusarnir græði sjálfir á þessu ? Það er spurning sem ég vil gjarnan fá svör við. Enginn gerir svona fyrir ekkert…. eða ætli það ?

Eins og þið sjáið á þessu þá er ég bandbrjáluð, út af þessu. Ég er löngu búin að fá upp í kok af framgöngu stjórnmálamanna sem ráðskast með okkur eins og við séum bjöllusauðir. Það hvarflar aldrei að þeim, að þeir hafi verið kosnir í almennum kosningum til að framkvæma það sem þeir lofuðu fólkinu. Það er gleymt um leið og talið hefur verið upp úr kjörkössunum. Og þeir geta farið að makka með þau völd sem VIÐ GÁFUM ÞEIM. Nema núna skiptum við engu máli, heldur bara þeir sjálfir og sú klíka sem stjórnar þeim á bak við tjöldin.

Vinstri grænir og Frjálslyndir eiga hrós skilið fyrir að vilja hindra þetta sóðamál. En Framsókn sýnir enn og aftur að flórinn er sá staður sem hún tilheyrir.

En við skulum ekki einblína á flokkslínur, hér eigum við öll að rísa upp hvar í flokki sem við stöndum og leiða ráðamönnum fyrir sjónir að svona gera menn ekki.  Þið sem eruð á suðvesturhorninu, mikið væri flott ef þið settust á þingpalla og fylgdust með umræðunni um þetta mál, og létu í ykkur heyra.  Hér sitjum við öll á sama bátnum.  Þetta er okkar allra mál, sameiginlegt fé, sem átti að renna í okkar sameiginlega sjóð.  Við verðum að segja HINGAÐ OG EKKI LENGRA!

Kúlublóm, og ýmislegt annað.

Ég ætla að tala um Bigbandið á morgun, en ég ætla að setja inn nokkrar myndir frá deginum í dag.  Þetta var mjög hlýr og fallegur dagur, sól og blíða.

Byrjaði með því að koma stelpunum á fætur og núna fer Jorga með þær á leikskólann.  Hún er frábær alveg hreint.

Hér sjáið þið hið fallega veður, en ég vona að þessi móska sé ekki mengun úr Funa, sorpbrennslustöðinni.  Vil eiginlega ekki hafa hana þarna lengur.

Ungviðið lék sér í allskonar leikjum, þarna nýtist gerfigrasvöllurinn aldeilis frábærlega vel.

Blómin poppa upp hvert af öðru hér er anemona sem brosir svo fallega í sólinni.

Prímulan gefur henni ekkert eftir.

Og þá hepatican mín.

Og eins og þið sjáið þá er páskarósin mín ennþá rosalega falleg, og hefur ekkert látið á sjá.

Sypresinn stendur sig líka rosalega vel eftir veturinn.

Og thujan mín.

Ein stemmningsmynd frá kvöldinu, hér er Ylfa Mist að syngja, hún var frábær í kvöld.

Ég fór líka á ansi fróðlegan fund með félögum mínum í Frjálslyndaflokknum, og er ákveðin í að gera skil á því sem þar kom fram hér.  Á morgun.

En Ásthildur er þreytt og lúin eftir frábært kvöld.  Og Jorga stóð sig rosalega vel í pössuninni.  Hún er að fá vin sinn hingað í vinnu, og svo dóttur sína, svo ég hef mikla von um að hún verði hér allavega þangað til dóttir mín kemur. 

En ég segi bara góða nótt elskurnar mínar og sofið rótt.

 

Stórsveit Írisar. Bigband í Edinborg.

Jæja þá kemst maður á tónleika, loksins.  Jorga mín ætlar að gæta barnanna fyrir mig, meðan ég bregð mér af bæ og fer og hlusta á minn elskulega eiginmann leika með bigbandinu hennar Irisar Kramer.  Tónleikarnir verða í Edinborgarhúsinu öðru af tveimur menningarhúsum Ísafjarðar í kvöld kl. 20.00.  Íris er þýsk en hefur verið mikið í músikkinni hér fyrir vestan ásamt eiginmanni sínum Hrólfi Vagnssyni. 

Ég hlakka til að hlusta á þessa frábæru hljómlistamenn sem við ísfirðingar og Bolvíkingar eigum.  Með í för verða tvær flottar söngkonur þær Ylfa Mist Helgadóttir og Ingunn Ósk Sturludóttir.  Lögin eru ekki af verri endanum Chicago, Over the rainbow, My girl, It don't mean að thing, Fly me to the moon, Spinning wheel og Stella.  Þarna verður líka jassband Og já það er frítt inn !!!

Allir hér fyrir vestan að drífa sig á tónleika.

Hér er stórsveitinn á tónleikum í fyrra í Menntaskólanum á Ísafirði.  Frábær músik frábær uppákoma. 

Mánudagur ekki til mæðu.

Dagurinn í dag var hlýr og notalegur, seinnipartinn byrjaði að rigna, lóðrétt, þar sem hér er logn.  Svo sannarlega vorveður.

Þær eru að leika sér í dúkkuleik dömurnar.

Sigurjón Dagur vildi líka leika með dúkkurnar.  Þó hann fengi að velja um bíla.  Nei hann vildi bara dúkkurnar sem stelpurnar voru með.

Litla skottið vill gefa honum dúkku.

En það er ekki sú rétta. 

En Jorga leikur við Ásthildi að bíl.  Það er gaman. 

Eins og ég sagði, þá var hið fegursta vorveður hér í dag, og snjórinn fer fljótt úr fjöllunum.

Svei mér þá skottið ætlar að detta aftur í tjörnina.  Ef hún heldur þessu áfram, þá endar það með því. 

Það er nefnilega allstaðar prófað að setjast niður á brúnina.

Krakkarnir fóru í sund í dag með Júlla og Siggu, þau fóru í laugina í Bolungarvík í dag, eða sundlaugargarðinn.  þar er nefnilega rennibraut.  Svo fóru þau upp í hlíð að steika sykurpúða.  Þau komu heim blaut af regni, og golsótt af sóti en rosalega glöð.

Eins og sjá má þá er Hanna Sól afar hamingjusöm með sitt sót, og sykurpúða.

Þeim var svo heitt, að þetta var klæðnaðurinn á stubbnum. 

Og Sóley Ebba þreytuleg.  Þau voru hundblaut, ekki bara af regni, heldur að sulla í lækjum og mýri sem þarna er.  Upp í hlíð er gott að vera fyrir börnin. 

Hvað er notalegra en brosandi glöð börn beint utan úr náttúrunni ?

Eða lítil óþekktarkrýli sem þarf að fylgjast vel með?

En við ljúkum myndaseríunni með Brandi upp á burstinni.  Þar hefur hann yfirsýn yfir allan heiminn.

Brandur yfir brúnir gjáist,

bannsett kattarskitinn.

Af fergju, vonar fuglinn sjáist,

feitur matarbitinn.

 

 

 

Annríki í kúlusúk.

Ég hef verið upptekin í dag.  Við fórum aðeins upp í gróðurhús að vinna hjónin, og svo ákváðum við að gera vorverk sem ekki mátti bíða lengur, það var að hreinsa fiskatjörnin.  Það var allt sett í gang, og allir hjálpuðust að eins og venjulega þegar þannig stendur á, en við tökum hana alltaf í gegn á þessum tíma.

Úbbs þetta er að vísu ekki fiskatjörnin, heldur byrjuðu þær litlu á að fara í bað í morgun hehehehe

Og hér er nýji heimilismeðlimurinn okkar, alltaf jafn yndæl og góð.

Ef Guð (Hanna Sól) lofar hehehehe þá fær mansjuríuhavairósin mín að blómstra bráðlega, hún er nú þegar búin að slíta upp tvö blóm.  Af því að hún elskar blómin hennar ömmu sinnar.

Kamelíufrúin er svo glæsileg og búin að vera núna í um það bil mánuð.

Veðrið eins og best verður á kosið.  Hlýtt rigningarúði og bara dýrðin ein.

Hanna Sól, ég ætla að taka af þér mynd í nýju fötunum frá ömmu Hönnu, ókey, sagði sú stutta, en ég ætla samt ekki að brosa. 

Og hefst þá ævintýrið.

Litla barnið hennar Hönnu Sólar og Ásthildur voru báðar mjög áhugasamar um fiskana.

Reyndar voru ALLIR áhugasamir um það sem í vændum var.

Einn og einn voru þeir veiddir upp úr tjörninni, fiskarnir og settir í bala.

Sjáiði, segir lita skottið, alveg yfir sig hrifinn af fiskunum. 

Veiðimaðurinn mikli að störfum.

Brandur hafði líka gífurlegan áhuga á þessum fiskum, sem þarna voru í boði... ekki Glitnis eða Landsbankans, heldur Kúlunnar.

Amma ég er komin með hanska, sagði Hanns Sól, eftir að hafa verið rekinn inn til að hlýja sér

Svo má alveg bregða sér á leik í hita og þunga dagsins, smá krabbaskemmtun.

Sú stutta sýndi gífurlegan áhuga á þessu öllu saman, í sjömílna skóm hehehehe.

Loksins var allt vatnið farið úr tjörninni, svo hægt var að fara að þrífa.

Mikið er nú gott að hafa gott fólk til að hjálpa til.

Það var samt tími til að sprella smá.

Loks var allt búið, og fiskarnir fengu að fara niður í hreina og tæra tjörnina sína aftur. Og þeir voru svooo glaðir.

Koma svo... komið til mín... ég vil fá einn fisk til mín...

Þá þurfti náttúrulega að fara aðeins yfir hreinsibúnaðinn.

Jamm og svo aðeins betur hehehehe.

Svo þurfti náttúrlega að kanna vatnið vel og vendilega.

Enginn mátti skorast undann..

Allir þurftu að prófa.

Jamm þannig var það staðfest að hreinsun tjarnarinnar hafði gengið að óskum, og allir ánægðir börn, fólk og fiskar. 

Svo seig nóttin á, og lítil stúlka vildi bara fá smá afaknús, bursta tennur, og svo ennibein og auga. auga, nebbi flipi, hökuskegg og hálsakot, en það er þannig sem við þvoum okkur fyrir háttinn hér í kúlusúk.

Og nóttin sígur á, dimm hljóð og notaleg. Góða nótt elskurnar.

Kúlublues og .....

Ojæja veðrið er að skána, við hættum við að fara í Reykjanes af ýmsum ástæðum, ein var sú að faðir minn elskulegur fór á spítala fyrir helgina, hann fékk svo leyfi til að fara heim til sín í dag, og við skiptumst á systkinin að dvelja hjá honum þangað til hann átti að fara yfir aftur.  Hann er svo mikil hetja að þó hann sé lasinn, þá þarf hann alltaf að vera riddaralegur.  Hann fær sem betur fer sennilega að fara heim aftur á mánudaginn.

En svona er lífið.  Ég sé ekki eftir þeim tíma sem ég eyði með föður mínum.  Sá tími sem við systkinin gáfum okkur til að vera hjá móður okkar í sínu stríði kenndi okkur að það að hlú að sínum nánustu er ómetanlegt svona eftir á. 

En að deginum í dag.

Hvítir hestar eru inn á þessu heimili í dag.

Litlir og stórir, Hanna Sól skammtar, þú mátt hafa þennan Sigurjón Dagur.

Þetta er eiginlega það sem ég kalla framlengingu á sumrinu, garðskálinn, þótt svalt sé úti, getum við grillað og verið léttklætt í garðskálanum, hér sért að Ásthildur hefur dýft öðrum fæti í tjörnina  En við grilluðum lax í kvöld og komumst að því að Litháar borða lax mest bara ofan á brauð.

Hér er skipst á upplýsingum, Elli kennir Jorgu íslensku, og hún kennir honum litháensku, það er gaman að sitja og spjalla saman um okkar ólíka bakgrunn og aðstæður. 

Já það er notalegt inni í garðskálanum, þið sem viljið lengra sumar, ekki spurning fá Einar Þorstein til að hanna kúluhús, með innigarði, og þið fáið 6mán. lengra sumar.

Það er bara ekki flóknara en það elskurnar.

Ég held að við hreinsum tjörnina á morgun, við gerum það alltaf einu sinni á ári.  Eins og sést hér er litli vökvarinn byrjaður aftur að "vökva" hehehehehe

Já nú verður upplýst um leyndarmál.  Það var nefnilega skipt á rúmunum í kvöld  Og þær litlu voru að hjálpa til, og það var roooooooooooosalega gaman.

´

Líka að hoppa, skríða undir lakið og bara þetta var sko FJÖR!!!

Jamm sumir hoppa ekki mikið og eru aðeins varfærnari með fæturna á jörðinni, ef svo má segja.

 

Hér er verið að spá í ýmislegt, eins og verðlag í Litháen og á Íslandi.  600 kall fyrir sigarettupakkann úbbs !!  ég verð að hætta að reykja Sigarettur eru fjórum sinnum dýrari hér ..hehehehe... maður getur fengið þrjár vodkaflöskur í Litháen fyrir eina á Íslandi.  Ig allt er voða dýrt hér miðað við .... þar.

En það er virkilega gaman að skiptast á upplýsingum og upplifa fólk í öðrum löndum svona náið.  Hún er að verða eins og ein af fjölskyldunni, og það er rosalega góð tilfinning fyrir okkur öll, litlu.. stóru fjölskylduna í kúlunni.

Kúlufjör.

Það snjóaði í gær, það hefur sem betur fer allt tekið upp aftur birrrrrr.

Við ætluðum inn í Reykjanes í dag, en erum sennilega hætt við.   Það er lítið gaman að vera með börn í hálfgerðri útilegu í svona veðri.  Þó maður sé auðvitað í herbergjum.  En svona getur nú gerst, og þetta var hvítasunnuhret, þau koma svo sem ekki á óvart.

Í hárgreiðslu.

Voða fín stúlka.

 

Sumir hafa einfaldlega önnur áhugamál.

Veðrir er svona la la la ..  Mætti vera betra samt.

Komin heim úr leikskólanum og þá er hægt að bregða sér í eitthvað notalegra.

Það er líka gaman að hoppa í ömmu rúmi.

Það er eiginlega lang notalegast.

Feðgar á ferð.

Og mæðgur líka.

Og bara fjölskyldur

Og notalegur mömmuknús.

Þetta eru myndir frá því í gær.  Eigið góðan laugardag elskurnar.

Smáföstudagshugleiðing -ömmur-

Ömmur fyrr og nú.

Hér áður voru ömmur.... ömmur, svona eldri konur sem höfðu lifað sitt fegursta, höfðu gefið allt af sér sem þær gátu fyrst börnum og svo barnabörnum. Þær voru heima prjónuðu sokka, klæddust fallegum búningum og svo framvegis.

Fullaf af lífsreynslu miðluðu þær komandi kynslóðum af reynslu sinni, voru reffilegar og glæsilegar engu að síður.  Bara á annan hátt en nú er.

Svona voru þær heima við.  Þetta var á tímum stórfjölskyldunnar, þar sem allir unnu saman.

Í dag er þetta öðru vísi svona úti frá séð.  Ömmurnar líta öðru vísi út, hafa önnur sjónarmið og aðra siði......

Svona líta nýjar ömmur út, en þær eru samt þarna fyrir barnabörnin miðla þeim af reynslu sinni og gefa þeim sennilega alveg heilmikið.

En ömmur eru og verða alltaf ömmur ekki satt ?

Talandi um vinkonur.

Þá fékk ég svo fallega kveðju inn á gestabókina mína, að mér fannst ég verða að setja hana inn hérlíka.

Ég var að leita að mynd af okkur sokkabandskerlunum, en fann bara ekki neina viðeigandi við þetta innlegg. 

Takk fyrir þetta innlegg Ingunn mín elskuleg.  Það gladdi mig mikið að lesa það.  Knús og kossar til þín frá mér.

Ég veit að ég á myndir af okkur, og ætla að setja inn ef ég finn. 

 

Kveðja frá gamalli sokkabandssöngkonu ;-)

Hæ elsku Ásthildur mín. Veistu það að dagurinn minn byrjar á því að athuga póstinn minn og þar á eftir....þín síða:-) Dagurinn er hreinlega ekki byrjaður hjá mér fyrr en ég er búin að kíkja á ykkur í kúluhúsinu... ég dáist svo að ykkur, hef reyndar alltaf gert, alveg frá því við vorum saman að syngja og sprella í Sokkabandinu forðum daga, mikið var gaman þá :-)Það er svo mikið og gaman að gerast hjá ykkur... og erfitt líka... dáist að ykkur að taka að ykkur öll þessi yndislegu börn sem ekki væsir um. Dáist líka svo mikið að börnunum ykkar, kraftmikið fólk sem veit hvað það vill og ef það fer út fyrir "brautina" þá kemur það sér inn á hana aftur.... super krakkar sem þið eigið elskurnar. Það var svo gaman að hitta ykkur í Laugardalnum fyrir hvað... einu eða tveimur árum síðan... og mér líður svo vel með að vídeospólurnar okkar eru í þinni vörslu..loksins... þó mig langi nú pínu pons í afrit af þeim ;-) Sokkabandstímabilið var eitt af mínum bestu tímabilum í lífinu.... það var svo gaman og gefandi að vera með ykkur stelpunum og sérstaklega þér Ásthildur mín. Nú og svo sakaði ekki að múrararnir okkar, pabbi minn og Elli þinn störfuðu svolítið saman (nýbúin að horfa á vídeo úr afmæli hjá pabba á Dalbrautinni í Hnífsdal... líklega þegar hann varð fimmtugur.... 20 ár síðan því hann hefði orðið/verður sjötugur núna þann 14. maí nk... þá var sko ekta vestfirsk partý...) ég á fullt af myndum þaðan...verð að senda þér nokkrar af ykkur heiðurshjónum - Ásthildi og Ella ;-) Þetta er víst orðið of langt til að vera smá klausa í gestabók en mig langar að segja svo margt Ásthildur mín... þú kenndir mér svo margt, komst mér út úr skel og varst mín besta trúnaðarvinkona á tímabili... betri leiðbeinanda hef ég ekki enn fengið :-) Ég óska þér og ykkur alls hins besta (ætti eiginlega að vera í vinnu hjá þér þar sem ég lærði í Gartnerskolen Söhus í Danmark blómaskreytingar og garðyrkjufræði en blessað bakið mitt leyfir ekkert skemmtilegt lengur ! Ég var spurð um daginn hvort mig langaði ekki að heimsækja Hnífsdalinn og allt þar um kring aftur ... ég sagði "nei" ég hef ekker þar að sækja en auðvitað er það bull!! Hefurðu séð síðuna www.hnifsdalur.blogcentral.is Það eru krakkar fædd frá 1970-1980 úr Hnífsdal sem ætla að hittast í sumar, margar skemmtilegar myndir þar og þau eru svo yndisleg þessar elskur, þau ætla að minnast Bubba míns með nokkurs konar legsteini um hann hjá týnda sjómanninum í kirkjugarðinum í Hnífsdal, ég hef sko tárast yfir minna tilefni.... féll eiginlega alveg saman að vita hversu víða hans er minnst... dásamlegt :-) Jæja elskan, ég kann ekkert á svona blogg, datt bara inn á gestabókina þína og ætla svo að reyna að senda þetta.. veit ekkert hvort þetta kemst til skila ... tölvuhæns.. það er ég !! Takk fyrir allt Ásthildur mín, ég lærði nýjar víddir við að kynnast þér, þú ert og verður alltaf "uppáhaldsstelpan" mín... ég á margar góðar og glæsilegar minningar frá okkar samskiptum og þinni trú á mér... ótrúlegt elskan og milljónfalt TAKK fyrir að leyfa mér að vera með á sínum tíma ;-) Flott lögin þín á síðunni, ég fékk svona smá flash back... oh það var svo gaman á æfingunum hjá okkur og tónleikunum... lögin þín hér á síðunni eru frábær og bara frábær :-) Skilaðu kveðju til Ella og barnanna og knús til elsku litlu skottana sem maður sér á hverjum degi á síðunni þinni :-) Það væri gaman að heyra frá þér Ásthildur mín...  Hafðu það alltaf sem best elskan og margfalt knús og kram í kúluhúsið fallega frá Ingunni Björgvinsd. - fyrrv. söngkonu Sokkabandsins hahahhaha :-))))

Ingunn Bjorgvinsdottir (Óskráður, IP-tala skráð), fös. 9. maí 2008

Til heiðurs afmælisbarns.

Árið 1944, þann 9. maí fæddist stúlkubarn á Ísafirði.  Það hefur ekki verið skráð í aðrar bækur en skýrslur sjúkrahússins og svo kirkjubækur, nema svona skýrslur og dót sem fylgir okkur alla leið.  En þessari stúlku átti ég eftir að kynnast, þegar ég hafði aldur til.  Hún var nefnilega nágranni minn frá barnsaldri og þangað til hún flutti úr foreldrahúsum.  Og við vorum skólasystur, bekkjasystur og vinkonur.  Svona vinir sem þurfa ekki endilega að hittast til að vináttan endist.  Hún bara er, og verður meðan við báðar lifum.  Dísa vinkona mín á sem sagt afmæli í dag.  Hún er frábær vinkona og ég var nær daglegur heimilisgestur á hennar heimili.  Enda mamma hennar frábær manneskja sem var gaman að spjalla við, hláturmild og bakaði bestu kleinur í heimi.  Ég man ennþá hlátur hennar, sem var dillandi.

En Dísa vinkona mín býr í Reykjavík í dag, hún svarar stundum í færslunum hjá mér.  Svo að ég sé og heyri meira af henni í dag, en í mörg ár á undan.  Svona getur tæknin fært mann nær hvort öðru.

Ég vildi bara segia innilega til hamingju með afmælið Dísa mín.  Megi allir góðir vættir vera með þér og vernda, og megir þú eiga gleðilegan afmælisdag

Knús á þig vinkona mín.