Fíflagangurinn leynist nefnilega víða Ólöf Nordal.

Tómur fíflagangur og ég veit ekki hvað Ólöf.  En þú gerir þér sennilega ekki grein fyrir því frekar en aðrir þarna sem vilja ekki og skynja ekki vilja þess meirihluta fólks sem kaus um nýja stjórnarskrá að þeir sjá fíflaganginn á báðum endum.  Við sjáum fíflagang ríkisstjórnarinnar að hafa ekki gengið fram með þetta mál fyrr og af meiri festu, sem mann fer að gruna að sé af því að fólk þar innandyra vill ekki nýja stjórnarskrá, þó þeir "þykist" hafa á því áhuga.  Þess vegna þora þau ekki að láta reyna á atkvæðagreiðslu á þingi, af því að þá þurfa þeir annað hvort að segja já við stjórnarskrárfrumvarpinu eða sýna sitt rétta eðli gagnvart kjósendum sínum svona rétt fyrir kosninga.

Á hinn bóginn er líka aumkvunarvert hvernig þið Sjálfstæðismenn og Framsókn reynið allt sem þið getið til að koma í veg fyrir þessa nýju stjórnarskrá.  Þið gerið ykkur ekki grein fyrir því að gamla lógikin gengur ekki lengur, fólk fylgist meira með myrkarverkum ykkar og yfirgangi gagnvart kjósendum.  Þið eruð því ekki að skora neitt hjá almenningi, en örugglega stórt meðal ykkar dyggustu kjósenda, enda ef til vill ekki vanþörf á því í minnkandi gengi flokksins.  Framsókn þorir ekki að rugga bátnum með allt sitt stækkandi fylgi, sem þeir vonast eftir að halda fram yfir kosningar.  Þó ég efist um það.

Endalaust raus um að það sé ekki hægt að samþykkja nýja stjórnarskrá, sem þjóðin samdi með þeim aðferðum og ferli sem fór í gang, í bullandi ágreiningi er orðin þreytt.  Með ykkar gömlu hunda á þingi verður aldrei hægt að samþykkja stjórnarskrá sem minnkar völd ykkar og frelsi til að svíkja endalaust þjóðina og plotta um valdið í bakherbergjum hvort sem þau eru reykfyllt eða ilmandi.

Ykkar tími er reyndar liðinn og vonandi verður stórsigur nýrra framboða það sem koma skal.  Ef fólk virkilega vill endurnýjun og hreinskiptari stjórnmál, þá ætti enginn að leggja sitt dýrmæta atkvæði á ykkar reikning, þá er ég að tala um fjórflokkinn.

Það er komin tími á breytingar, það er komin tími til að reyna eitthvað nýtt.  Nýtt fólk með ferskar hugmyndir og kjark og þor til að takast á við klíkurnar sem bíða með vasa fulla af peningum til að kaupa ykkur, klíkur eins og L.Í.Ú. er að mínu mati.  Þeir virðast hafa allan fjórflokkinni í vasanum, eða ég get ekki séð annað en að það sé ekki hægt að ræða um sjávarútvegsmál án þess að þeir rjúki upp með andfælum og öskri; hafið ykkur hæg þarna á þingi við borgum vel fyrir þjónustuna! Þetta er allavega mín upplifun af þessum mönnum, rétt eins og aðrar klíkur t.d. bankamafían sem ekki er hægt að taka á með réttum handtökum og fleiri aðilar sem virðast vera skuggastjórnendur í fjórflokknum.  Þannig er það bara. 

Svo ég segi nú bara fyrir mig; venjulegir íslendingar farið að skoða hvað er í boði, lesið það sem nýju framboðin hafa fram að færa og ræðið við forystumenn framboðanna og spyrjið og fáið heiðarleg svör um hvað þeir séu að huga og hver stefna framboðanna er.  Og varist hræsnina og lygina sem leitar oft upp á yfirborðið, lygarnar sem koma svo upp á yfirborðið eftir kosningar, þegar þarf ekki lengur að reiða sig á ykkur næstu fjögur árin. Munið svik VG, látið þau svik ykkur að kenningu verða. 

Ég veit að ég má ekki nota þetta lógó, en mér finnst það bara svo fallegt, og oft geri ég bara annað en ég má. 

„Tómur fíflagangur á Alþingi“

Athugasemdir

[Ragna Birgisdóttir, 21.3.2013 kl. 18:15]

Áldrottningin þarf ekki að hafa áhyggjur af framtíðinni með sín ættartengsl og vera gift forstjóra Landsvirkjunar. Hún er hundleiðinleg,með útgeislun á við álklump og sem betur fer að flytja af landi brott.

[Ásthildur Cesil Þórðardóttir, 21.3.2013 kl. 18:35]

Hahaha Ragna frábært komment frá þér Útgeislun á við álklump, þetta er frábærlega orðað.

[Kolbrún Hilmars, 21.3.2013 kl. 19:42]

Æi, ég er ekki mikið gefin fyrir að fara í manninn ef boltinn er í seilingarfæri. 

En í þetta sinn er ég sammála bæði  þingmanninum Ólöfu XD og Jóhönnu forsætis XSF; að slíta þingi á morgun föstudag.

Það prófar enginn neitt nýtt ef hann veit ekki af því.  Nóg er að fjórflokkurinn hafi sett 5% mörkin þótt hann sameinist ekki líka um að trufla kjósandann í því að fá að kynnast öllum nýju framboðunum.

[Ásthildur Cesil Þórðardóttir, 21.3.2013 kl. 20:18]

Í raun og veru verður enginn mega kosningabarátta hvort sem er fyrr en eftir páska.  En þá verður líka allt lagt í að ota sínum tota.  Þá byrjar slagurinn og leirböðin og allt sem fylgir

[Kolbrún Hilmars, 21.3.2013 kl. 20:35]

Rétt hjá þér Ásthildur.  Fólk hefur bara gott af því að fá að anda með nefinu og ráðgast hvert í sínu horni yfir páskahelgina.  Að því gefnu auðvitað að ríkisstjórnin og þingið hennar steli ekki senunni aftur eins og síðast.  

[Atli Hermannsson., 21.3.2013 kl. 21:01]

Ólöf er gift Tómasi Má Sigurðssyni sem var fostjóri Alcoa Fjarðaráls frá stofnun og þar til fyrir um ári síðan. Þá var hann hækkaður í tign og gerður að forstjóri Alcoa í Evrópu. Það ættu alla vega að vera hæg heimatökin hjá Ólöfu að spyrjast fyrir um hvernig fyrirkomulaginu á eignarhaldinu, skuldastöðunni, vöxtunum og tekjuskattinum er háttað.

[Ásthildur Cesil Þórðardóttir, 21.3.2013 kl. 21:57]

Atli þú meinar svona koddahjal eins og rætt var um þegar frú Sólveig Pétursdóttir átti að ræða við sinn ektamaka um olíuauð?  Hehehe það virðist vera ansi erfitt að ræða svona háalvarleg mál á koddanum.  Enda hentar það henni örugglega ekki að fá vitneskju um allt svínaríið.  Því hún gæti verið krafin um sannleikan á "hinu háa alþingi" þannig séð

Já Kolbrún, þó þau starfi fram að páskum, þá geta þau rétt eins og við hin slakað á yfir páskana, þau eru með samskonar líkama og við og þurfa sjálfsagt bara svipaðan hvíldatíma og allir aðrir, þó þau haldi annað sjálf.

[Ingibjörg Ingadóttir (IP-tala skráð) 22.3.2013 kl. 00:53]

Ólöf er Nordal, afkomandi fræðimannsins Sigurðar Nordal. Til er fólk sem heitir Norðdal, en það er allt önnur ætt.

[sæmundur (IP-tala skráð) 22.3.2013 kl. 08:53]

Voru ekki 27 nýir þingmenn á yfirstandandi þingi. ?

Fer Dögun ekki að gefa út matreiðslubók fyrir fátækt fólk ?? hvernig hægt sé að lifa á nýrri stjórnarskrá??

Eru ekki brýnni mál sem snerta hag heimilina sbr tillögu Eyglóar Harðardóttir um hámark þess hve verðtryggð lán geta hækkað ? eða var komið í veg fyrir að þessi tillaga sé til umræðu

[Ásthildur Cesil Þórðardóttir, 22.3.2013 kl. 10:25]

Takk fyrir ábendinguna Ingibjörg ekki ætlaði ég að misrita nafn hennar það er hér með leiðrétt í fyrirsögninni. 

Sæmundur Dögun er með margt gott á sinni stefnuskrá, skjalfest og samþykkt.  Þó að við séum hlynnt nýrri Stjórnarskrá, þá er það Hreyfingin sem hefur barist harðast á þingi að fá hana fram, sem er þarft mál og gott. 

Hér eru samþykktir í þágu heimilanna til dæmis: http://xdogun.is/oflugar-adgerdir-i-thagu-heimila/

Þú getur lesið þér til á xdogun.is ef þú hefur áhyggjur af að þrautpíndur almenningur verði látinn eta stjórnarskrána. 

[Ásthildur Cesil Þórðardóttir, 22.3.2013 kl. 10:35]

Hvað varðar þessa 27 nýju þingmenn, þá er það svo að þeir sem koma inn í fjórflokkinn samsamast furðufljótt því fólki sem hefur setið þar sumt yfir þrjá áratugi.  Þau læra fljótt og vel af þeirri andlega dauðu pólitík og refskap sem þau sjá fyrir sér.  Þar sérðu mun á Hreyfingunni, þau hafa ekki slíkar fyrir myndir og það sést vel.