Blame it on Bakkus.

Björgvini er sannarlega vorkunn, og ég vona innilega að honum takist að komast upp úr sínum áfengisvanda.  En það er ýmislegt sem ekki stenst hjá honum blessuðum.  Í fyrsta lagi vil ég segja að það er enginn afsökun fyrir því sem hann gerði að hann er alkóhólisti.  Ef allir gætu bara komið því yfir á drykkju eða fíniefnaneyslu sem þeir gera, þá væri nú margur maðurinn ekki bak við lás og slá. Í öðru lagi skil ég ekki ef allt var svona upp á borðinu eins og hann segir, af hverju fór hann þá ekki réttu boðleiðina, þ.e. að tala við gjaldkera og sína yfirmenn um að fá fyrirframgreiðslu.  Það hefði verið meiri mannsbragur að því.  

Og svo þessar 14 úttektir á korti sem hann var með frá sveitarfélaginu.  

Ég er auðvitað alveg viss um að hann ætlaði að greiða þetta, en það eru svo margir sem einmitt byrja svoleiðis fá "smálán" og svo aftur og aftur.  Skuldin var jú komin upp í hálfa miljón, og var síðan í október, án þess að hann gerði hreint fyrir sínum dyrum.

Auðvitað átti hann að gera þetta upp við áramót, eða allavega láta vita af skuldinni, nema auðvitað að hann hafi "gleymt" henni eða vonast til að þurfa ekki að standa skil.

Mest er ég samt undrandi á fólki sem afsakar þessa framkomu.  Þeir sem veljast til trúnaðarstarfa eiga að standa undir þeirri ábyrgð sem þeir hafa axlað.  Og við eigum ekki að líða slíkt, því vissulega þarf almenningur í landinu að veita þeim aðhald sem þannig eru.  Þetta á jafnt við í stjórnkerfinu og sveitarstjórnarstiginu.  Um leið og við gefum afslátt þá erum við að segja að svona sé bara allt í lagi, sem það auðvita er ekki.  

Björgvin er ennþá tiltölulega ungur maður, vonandi lærir hann af þessu, stundum þurfa menn að horfast í augu við gjörðir sínar til að gera það.  Hann getur ennþá áunnið sér traust með því að vera grandvar en það er afskaplega erfitt þegar trúnaður hefur verið brotinn.  Ef hann væri valdalaus maður og ekki innarlega í Samfylkingunni (skrifist hvaða flokkur af fjórflokknum sem er)ætti hann sér ekki viðreisnar von, en flokkarnir sá um sína endalaust.  Sem ef til vill verður svo til þess að menn verða kærulausir og siðlausir, vegna þess að þeir þurfa aldrei að bera ábyrgð á gjörðum sínum. 

En ég óska honum góðs bata og betri framkomu í framhaldinu.  Batnandi mönnum er best að lifa.  

Björgvin í áfengismeðferð